Акафисты

Кондак 1

Избранному и дивному новому сибирския страны чудотворцу всерадостно ныне приносим ти, святе Симеоне, хвалебная пения; ты же, яко имеяй дерзновение ко Христу Богу, от всяких нас бед свободи, да зовем ти: Радуйся, Симеоне, чудотворче предивный.
Икос 1

Ангел во плоти и небесный человек явился еси, блаженный Симеоне, ангельски бо в мире сем пожил еси, темже и ангельстии чини удивишася непорочности твоего жития и, по преставлении твоем, с веселием прията праведную твою душу; сего ради и мы, чудящеся высоте твоея добродетели, прославляем тя сице:

Радуйся, яко свято и богоугодно на земли пожил еси;

Радуйся, яко подвигом добрым зде подвизався, течение свое праведно скончал еси;

Радуйся, яко ныне преселился еси в покоища небесная;

Радуйся, яко в обителех премирных, яже уготова Бог любящим Его, на нескончаемыя веки водворяешися;

Радуйся, яко Царь царствующих прият тя в Небесное Царствие;

Радуйся, яко присно со ангелы в небеси обитаеши;

Радуйся, яко с пророки и апостолы вселяешися;

Радуйся, яко с постники и преподобными торжествовати сподобился еси;

Радуйся, яко предстоиши ныне со всеми святыми Престолу Божию;

Радуйся, яко Пресвятую Троицу несредственне зрети сподобляешися;

Радуйся, яко неизреченную славу Господню явственне созерцаеши;

Радуйся, яко тоя причастника быти удостои тя Господь;

Радуйся, Симеоне, чудотворче предивный.

Кондак 2

Видя вдовицу зело плачущую, якоже бо тогда умилосердився, и изнемогшу телом и бывшу близ конечнаго издыхания и очима нимало зрети могущу, явився исцелил еси, сице и о мне умилосердися, угодниче Божий, и от многих грехопадений немощствующее тело мое исцели и душу мою ко спасению настави, да в радости воззову к Богу песнь: Аллилуиа.

Икос 2

Разумети хотящу архиерею сибирския страны имя твое, егда обретены быша святыя твоя мощи, ты в видении явлься ему, о имени своем возвестил еси; он же, удивився чудеси и прославив Бога, и похвальныя глаголы вещая, вопияше тебе сице:

Радуйся, великий праведниче Божий, в чудесех просиявый;

Радуйся, целебниче недугов всем, призывающим тя с верою;

Радуйся, яко и прежде прошения помощию предваряеши;

Радуйся, яко и недоумевающих о прославлении нетленных мощей твоих чудесы твоими вразумил еси;

Радуйся, яко разслабленных укрепил еси;

Радуйся, яко слепым прозрение даровал еси;

Радуйся, хромым хождение устрояяй;

Радуйся, от беснующихся бесов отгнателю;

Радуйся, скорбных утешителю;

Радуйся, нищих и убогих покровителю;

Радуйся, православных утверждение;

Радуйся, ересей посрамление;

Радуйся, Симеоне, чудотворче предивный.

Кондак 3

Сила Вышняго утверди тя в житии твоем святом; и ты подвизался еси о спасении души твоея, трудами бо и воздержанием увядил еси плотския страсти и в непрестанных молитвах твоих всегда взывал еси к Богу: Аллилуиа.

Икос 3

Имеяй милосердие многое, о призывающих тя с верою присно мблишися к Богу, у Него же равноангельным житием твоим великое дерзновение стяжал еси; не презри и нас недостойных, требующих твоея помощи, и яко дары, приими от нас песнь сию:

Радуйся, яко вся, елика просиши от Бога, дарует ти Господь;

Радуйся, яко молитвы твои о нас, якоже кадило благовонное, от Бога приемлются;

Радуйся, яко возжада душа твоя к Богу крепкому;

Радуйся, Христа единаго возлюбивый;

Радуйся, яко невозвратным желанием последовал еси Ему;

Радуйся, добродетельное житие всегда имевый;

Радуйся, возненавидевый страсти мира сего;

Радуйся, маловременнаго утешения на земли не искавый;

Радуйся, смиренномудрием украсивыйся;

Радуйся, твердый адаманте и столпе непоколебимый прилоги вражиими;

Радуйся, яко нетлением тело твое прослави Господь;

Радуйся, яко от гроба твоего и персть приемлющии исцеляются;

Радуйся, Симеоне, чудотворче предивный.

Кондак 4

Буря недоумения смущает мя, како возмогу достойно воспети чудеса твоя, блаженно Симеоне, кто бо многих чудотворений твоих дары по достоинству изрещи может? Обаче и аз дивно в тебе прославляющемуся Богу вопити дерзаю: Аллилуиа.

Икос 4

Слышавше, блаженне и предивне Симеоне, о величии чудес твоих, яко молитвами твоими сущих в бедах и скорбех предваряеши, скоро от них избавляя, вопием тебе таковая:

Радуйся, избавление наше от печалей и скорбей;

Радуйся, яко твоим предстательством даруется духовная благодать всем, с теплою верою к тебе притекающим;

Радуйся, яко твоими молитвами козни нечистых духов побеждены;

Радуйся, яко и неведущим и неслышавшим о прославлении твоем исцеление подаеши;

Радуйся, яко целебныя дары всюду точиши;

Радуйся, яко страну сибирскую присно присещаеши;

Радуйся, скорый обидимых заступниче;

Радуйся, сущим в лютых обстояниих пособниче и предстателю;

Радуйся, малодушныя утешаяй;

Радуйся, недужным крепкое исправление;

Радуйся, плененным скорое свобождение;

Радуйся, грешным ко спасению наставление;

Радуйся, Симеоне, чудотворче предивный.

Кондак 5

Пресветлая звезда явился еси, праведный Симеоне; сущих бо во тьме умныя очи озаряя светом Евангелия Христова и избавляя заблуждших от сетей змиевых и от всех коварств его, научил еси я благодарственно и всерадостно с лики святых ко Христу Богу вопити: Аллилуиа.
Икос 5

Видевше в житии твоем, блаженне, духовных подвигов твоих высокая исправления, всякий разум удивляющая, прославляем давшаго ти таковую благодать Бога, тебе же хвалебными гласы сице вопием:

Радуйся, яко юрод быв Христа ради, высоту смиренномудрия стяжал еси;

Радуйся, яко странник и пришлец на земли обрелся еси;

Радуйся, яко ныне гражданином небесным быти на нескончаемыя веки сподобился еси;

Радуйся, яко незлобивый агнец в терпении твоем был еси;

Радуйся, яко кротостию ко озлобляющим тя землю живых наследовал еси;

Радуйся, чистыми душу и тело твое сохранивый, и ныне чистым сердцем зряй Бога;

Радуйся, яко мудрою мыслию утвердивый душу твою во спасение;

Радуйся, яко с невозвратною надеждою благ вечных преставился еси к Богу;

Радуйся, яко деснаго стояния со избранными удостоился еси;

Радуйся, яко не скрыл еси таланта, ввереннаго ти Богом;

Радуйся, благий рабе и верный, вшедый в радость Господа своего;

Радуйся, яко ныне утешаешися, якоже древний оный евангельский Лазарь, на лоне Авраамли;

Радуйся, Симеоне, чудотворче предивный.

Кондак 6

Проповедника богоноснаго Павла вещание и глаголы исполняя, Симеоне святе, юродственное Христа ради на земли пожил еси житие, и болезни многия претерпевая, всегда благодарственныя Богу возсылал еси хвалы, сице глаголя Ему: Аллилуиа.

Икос 6

Возсиял еси велие просвещение светлостию чудес твоих, праведный Симеоне, от святаго гроба твоего непрестанно истекающих, и тем далече отгнал еси тьму ересей и расколов от окрестных мест, идеже в правоверии и благочестии подвизался еси и в нетлении телеси почиеши; мы же, чудящеся сим, взываем ти сице:

Радуйся, яко явился еси во стране сибирстей крепкий защитник православия противу развратников и хульников Христовы Церкве;

Радуйся, яко и ныне борющимся с ними усердный пособник обретаешися;

Радуйся, противников Святыя Церкви посрамителю;

Радуйся, злых волков от стада Христова отгнателю;

Радуйся, облекийся во оружие света; Радуйся, лукавствующих обличителю;

Радуйся, православных тихое пристанище;

Радуйся, путешествующих благое поспешение;

Радуйся, яко и от многия скудости твоея разумевал еси на нища и убога;

Радуйся, яко милостив быв при жизни, благотвориши всем требующим и по смерти;

Радуйся, яко избрал еси добрая, еже Бога ради труждатися;

Радуйся, яко на тебе исполнися слово подвижническое, болезненно, еже труждатися, но блаженно восприятие;

Радуйся, Симеоне, чудотворче предивный.

Кондак 7

Хотящу некоему человеку от многих врачев исцелитися от очныя болезни, и егда ничтоже успе, прибегшу к тебе, врачу безмездному, ты очи его, наполнены кровию и зрети немогущая, перстию внезапу исцелил еси; он нее возрадовався, благодаряше тя и, Бога прославляя, рече: Аллилуиа.

Икос 7

Дивна тя показа нам Творец и Господь всех чудотворца: егда бо нетлением прослави тело твое, тогда и земля не скры гроб твой и яви всем нам, яко многоценное сокровище; темже и мы чудящеся вопием сице:

Радуйся, цвете нетленный, в стране сибирстей прекрасно процветый;

Радуйся, доблий подвижниче благочестия, во граде Верхотурстем возсиявый;

Радуйся, яко являешися аки древо животное, от негоже недугующии получают исцеление;

Радуйся, яко предстательством твоим пред Богом, аки ветвь благосеннолиственная, покрываеши нас;

Радуйся, яко добре вкоренился еси в вертограде Христовы Церкве;

Радуйся, яко обильные плоды добродетелей принесл еси Богу;

Радуйся, яко пиеши ныне воду животную от неисчерпаемаго источника безсмертия;

Радуйся, заблуждших наставниче;

Радуйся, яко кающимся в согрешениях испрошаеши от Бога прощение;

Радуйся, и всех благих нам от Него ходатаю;

Радуйся, яко светлую одежду чистоты и целомудрия добре сохранив, вшел еси в чертог небесный;

Радуйся, яко чистая душа твоя к лику Евангельских мудрых дев сопричтеся и купно с ними (ангельски) водворяется в небесном чертозе Жениха Христа;

Радуйся, Симеоне, чудотворче предивный.

Кондак 8

Странное на земли житие пожив и удалйвся суетнаго мира, добродетельми к Богу приближился еси, сего ради высокий Бог, видя твое смирение, возвеличи тя Своею благодатию; Егоже восхваляюще, поем Ему кутгно с тобою ангельскую песнь: Аллилуиа.

Икос 8

Весь ум твой в вышний Иерусалим присно простирая, аще телом и на земли пребывал еси, вся красная мира сего возненавидел и равноангельское житие зде пожил еси, Симеоне блаженне, тем и от чтущих тя слышиши сия:

Радуйся, человече Божий досточудный;

Радуйся, зерцало добродетелей преизящных;

Радуйся, пременивый тленная настоящая на будущая вечная;

Радуйся, уподобивыйся Иову терпением;

Радуйся, селение честное Святыя Троицы;

Радуйся, святче Божий, со всеми святыми прославляемый;

Радуйся, ковчеже, от потопа греховнаго призывающих тя спасающий;

Радуйся, яко услаждал еси сердце твое веселием будущих благ;

Радуйся, воздержанием плоть твою изнуривый;

Радуйся, яко святостию жития твоего милость Божию обрел еси;

Радуйся, яко непрестанными молитвами о нас Бога умилостивлявши;

Радуйся, яко благим надеждам твоим исполнение приял еси;

Радуйся, Симеоне, чудотворче предивный.

Кондак 9

Все множество человеческое удивися еже на земли во плоти твоему терпению и незлобию, непорочна и праведна тя зряще, и ныне милостивым твоим предстательством в скорбех нас не оставляюща; темже и мы, радующеся, к Богу поем песнь: Аллилуиа.

Икос 9

Витии многовещанныя изнемогоша по достоинству поведати многое твое терпение и теплую ко Христу любовь; аз же многогрешный како возмогу изглаголати равноангельное твое житие и преславная чудеса! Но обаче дерзаю, надеяся на твое беззлобие, вопити тебе сице:

Радуйся, яко ангелом подобяся, выну пущал еси на небо очи твоего сердца;

Радуйся, яко доблими твоими подвиги спасение и венец нетленный от Христа Бога приял еси;

Радуйся, яко на всяк день и на всяку нощь славословил еси Творца всяческих;

Радуйся, яко победил еси диавола смирением своим;

Радуйся, яко нищ телом и духом был еси на земли, сего ради уготова ти Господь Царство Небесное;

Радуйся, кротости ради твоея наследивый землю обетования;

Радуйся, яко и иных, зрящих твою святость, научил еси праведно жити;

Радуйся, яко душевныя страсти испеляеши;

Радуйся, яко телесныя болезни врачуеши;

Радуйся, яко и многовременныя недуги от человек отгоняеши;

Радуйся, яко сущим близ конечнаго издыхания здравие даруеши;

Радуйся, яко и от смертоносных язв свобождаеши;

Радуйся, Симеоне, чудотворче предивный.

Кондак 10

Спасение восхотев дати Господь людем Своим, светлаго светильника всем нам даде тебе, точаща благодать цельбы всем, притекающим к раце мощей твоих; и мы, получивше милость от безмезднаго тя врача, благодарными гласы восхваляюще Бога, поем песнь: Аллилуиа.

Икос 10

Стена еси ты и покров всем притекающим к тебе, праведный Симеоне, ибо Господь прослави тя, украсив нетлением и чудесы и приглашати тебе научи:

Радуйся, столпе непоколебимый православия;

Радуйся, сокровище неоскудно многих исцелений;

Радуйся, подателю просящим у тебе яже на пользу;

Радуйся, уцеломудривый живущия студно;

Радуйся, наказателю помраченных умом;

Радуйся, учителю смиренномудрия и терпения;

Радуйся, яко в сониях являяся, научаеши доброму житию;

Радуйся, звездо, чудесно возсиявшая в сибирстей стране;

Радуйся, яко лучами чудотворений твоих просвещаеши и далечайшия страны;

Радуйся, яко некогда незнаем, ныне же со славою познаваешися от всех ищущих тя;

Радуйся, яко рыбарем быв, соделался еси ловцем человеков;

Радуйся, яко ходатайством твоим к Богу мук вечных свобождаеши нас;

Радуйся, Симеоне, чудотворче предивный.

Кондак 11

Пение умиленное приношу ти, недостойный, и вопию со слезами: ходатайствуй за мя присно к Богу, душею и телом от страстей, воюющих на мя, люте недугующаго, и подаждь ми молитвами твоими исцеление и грехов избавление, от сердца тебе сия приносящему, да и аз в радости воспою прославляющему тя Богу песнь: Аллилуиа.

Икос 11

Светоприемную свещу зрим тя, богомудре Симеоне: невеществен-ным бо любве огнем возжеглся еси и наставляеши к божественному деянию вся, образом жития твоего, яко зарею, просвещая чувства наша; темже и достоин еси званием почитатися сим:

Радуйся, луче пресветлая, от Солнца Христа возсиявшая;

Радуйся, светило благочестия немерцающее

Радуйся, яко свет премудрости Божия просвети душу твою;

Радуйся, яко вечнаго сего света лучей чрез тебе и мы сподобляемся;

Радуйся, безмездный врачу;

Радуйся, яко источаеши обильныя струи исцелений;

Радуйся, благонадежный о нас предстателю и молитвенниче пред Престолом Господним;

Радуйся, спасительное пристанище всем, притекающим к тебе;

Радуйся, яко сущим в пучине скорбей добр обретаешися кормчий;

Радуйся, теплый заступниче сущим во обстояниих лютых;

Радуйся, благоухание духовное источаяй от многоцелебных твоих мощей;

Радуйся, елеем радования исцеляяй скорби душевныя верою молящихся тебе;

Радуйся, Симеоне, чудотворче предивный.

Кондак 12

Благодать превелию даде тебе Господь недужных болезни врачевати, демоны прогоняти и страсти целити; темже не забуди и нас, усердно призывающих тя во время тесных обстояний и тяжких напастей, и молитвами твоими от оных избави, да благодарно вопием к Богу: Аллилуиа.

Икос 12

Поюще твоя чудеса, праведный Симеоне, верою несомненною притекаем к многоцелебным и святым мощем твоим, и припадая к ним, с любовию и страхом лобызаем оныя. Ты же, о святче Божий! Яко благоутробный, принеси моление ко Владыце, да сподобит нас деснаго стояния на суде Своем, вопиющих к тебе сицевая:

Радуйся, великий Христов угодниче;

Радуйся, молитвенниче усердный о воспевающих тя;

Радуйся, Божий избранниче, благодатию Духа Святаго приосененный;

Радуйся, праведниче, возвеселивыйся о Господе;

Радуйся, яко мзда твоя многа на небесех;

Радуйся, предстателю наш скорый и теплый;

Радуйся, ходатаю неусыпный о нас пред Богом;

Радуйся, иго благое и бремя легкое понесый;

Радуйся, за труды твоя и подвиги на земли вечное упокоение обретый на небеси;

Радуйся, яко временных и вечных благ от Бога нам присно просиши;

Радуйся, о кающихся споручниче пред Богом;

Радуйся, кадило благовонное, облагоухающее чтущих тя;

Радуйся, Симеоне, чудотворче предивный.

Кондак 13

О пречудный и милостивый новый чудотворче, праведный Симеоне! Приими ныне малое сие моление наше и принеси е ко Христу Богу нашему, да сохранит нас от враг видимых и невидимых, от нашествия иноплеменник, от недуга и глада, от всякия скорби и внезапныя смерти и будущаго вечнаго мучения избавит, молитвами твоими, всех вопиющих к Нему: Аллилуиа.

Этот кондак читается трижды, затем икос 1 и кондак 1

Кондак 1

Возбра́нный нашего спасения побо́рниче, изрядный благовестниче веры Православныя в земли Сибирстей, благочестие в сердцах чад Божиих усердно все́явый: ныне престолу Царя славы Христа предстоя, о нас моли́ся, еже стяжа́ти нам огнь любве негасимый к Богу и ближним, и молитвами твоими от всяких бед избави нас, зовущих ти:
Радуйся, Арефо, о нас моли́твенниче к Богу неуста́нный.

Икос 1

Ведо́мый Божественным промыслом, от юности дом родительский оставив, пресели́лся еси на остров Валаа́м, и та́мо положил еси начало подвигу иноческому. Последи же многими дары небесными украси́ тя Создатель Господь: скорбящия души утеша́ти,ожесточе́нныя сердца́ умягчати. Ныне же сотвори молитву о нас недостойных, чтущих лю́бовию память твою, да си́це тебе возгаго́лем:
Радуйся, из де́тства возлюбивый благонра́вие: / радуйся, от юности оставивый плотское мудрова́ние.
Радуйся, в обители Сергия и Германа всели́выйся: / радуйся, тамо смирению и посту научи́выйся.
Радуйся, подвигов отцев валаа́мских ревни́телю:/ радуйся, послушаний многосложных исполни́телю.
Радуйся, надменность ни во что же вмени́вый: /радуйся, Богу и братии смирением угоди́вый.
Радуйся, Антипы, старца дивнаго насле́дниче: / радуйся, Иису́совы молитвы неусыпныя исто́чниче.
Радуйся, иноческое житие на острове нача́вый: / в земли Уральстей благодать обильную стяжа́вый.
Радуйся, Арефо, о нас молитвенниче к Богу неустанный.

Кондак 2

Сила Божия укрепля́ше тя, отче преподобне, егда молитвою, бдением и постом подвизался еси на острове: но Господь-Промыслитель дарова́ ти и́но место во спасение, и после́дуя совету И́ова архимандрита, Валаам оставив, вселился еси во обитель Верхотурскую, иде́же в неуста́нном труде пребывая, и искушения препобежда́я, единому Богу воспевал еси: Аллилуйя.

Икос 2

Ви́дя душу твою чи́сту и желание послужити в ангельстем чине Христу, наставник твой Иов напра́ви тя в обитель Верхотурскую, идеже и доныне почива́еши мощьми́ своими, отче Арефо, вознося за нас молитву непрестанную ко Господу. Темже мы благодарно зовем ти:
Радуйся, к добродетелям иноческим душу устреми́вый: / радуйся, сладость молитвы и поста вкуси́вый.
Радуйся, смирение послушанием воспита́вый: / радуйся, место подвигов новое избра́вый.
Радуйся, яко в Верхотурье пришел еси благословением: / радуйся, приял труды в кинови́йномустрое́нии.
Радуйся, все упование на Богоматерь возложи́вый: / радуйся, Сыну Тоя́ усердно послужи́вый.
Радуйся, прие́мый с кротостию диа́конский сан: / радуйся, устро́ивый порядок по архи́вным делам.
Радуйся, нравом тихим, безмятежным украше́нный: / радуйся, яко от рук Христа все послушания прие́мый.
Радуйся, Арефо, о нас молитвенниче к Богу неустанный.

Кондак 3

Сила Божия укрепля́ше тя, отче, егда подвиза́лся еси в посте и молитве, в труде неустанном и бдении, вся́кия искушения препобежда́я: возложив упование на Творца, истинный проповедник любве Христовы явился еси, братии и всем притека́ющим в обитель. И ныне предстоя престолу А́гнчу, со всеми избра́нными пое́ши Богу: Аллилуйя.

Икос 3

В прише́дый час отыде на покой отец Иов, и возврати́ся в обитель Валаамскую: отцы же верхотурския в первый раз избра́ша настоятеля себе из братии, единодушно пожела́вше видети пастыря и́ночествующим то́кмо тебе, благонравный Арефо. Сего ради Господа сла́вяще, воспеваем ти:
Радуйся, небесным покровителем от юности не оставля́емый: / радуйся, Творцом ко пастырству приуготовля́емый.
Радуйся, на праздник «Спори́тельницы хле́бов» сподо́бивыйся рукоположения: / радуйся, от Господа почте́нный даром рассуждения.
Радуйся, иго настоятельства с кротостию на раму восприе́мый: / радуйся, крест свой в руце, яко знамя, взе́мый
Радуйся, прибегающим к тебе отец чадолюби́вый: / радуйся, желающим спасения усердно послужи́вый.
Радуйся, братию любовию своею покрыва́яй: / радуйся, приходящих к тебе не отверга́яй.
Радуйся, наставниче, сердца управля́яй к небеси: / радуйся, проповедниче, умы́ пита́яй словесы́.
Радуйся, Арефо, о нас молитвенниче к Богу неустанный.

Кондак 4

Буря треволне́ний житейских не возмо́же поколеба́ти благое житие твое, наставниче Арефо, яви́вый любовь нелицемерную, в молитве неотступность и твердость в воздержании, и ревность ве́лию духа твоего, соде́лався стена крепка́ обители твоей. Темже подвиго́м твоим дивя́щеся, братия просла́виша Христа, мы же со усердием воспеваем: Аллилуйя.

Икос 4

Слышим и веруем, яко многоце́нны яви́шася пред Го́сподем труды твоя: ты бо книгами духовными обогати́л еси обитель, и упра́вил еси по чину архивы, и на ниве просвещения трудился еси, двухклассную школу устроив, ныне же твоим успехом ра́дующеся, песнопения тебе приносим и молитвенно взываем сице:
Радуйся, заповедей Божиих исполни́телю: / радуйся, невидимых врагов победи́́телю.
Радуйся, в землю Сибирскую Богом призва́нный: / радуйся, во утешение нам дарова́нный.
Радуйся, не отступи́вый устава общежи́тельнаго: / радуйся, училище устро́ивый при оби́тели.
Радуйся, де́тем малым и неиму́щим послужи́вый: / радуйся, закону Божию тех учи́вый.
Радуйся, приобрета́вый книги богомудрыя для бра́тии: / радуйся, в делах образования внима́тельный.
Радуйся, постом душетле́нныя страсти умертви́вый: / радуйся, до конца себе смири́вый.
Радуйся, Арефо, о нас молитвенниче к Богу неустанный.

Кондак 5

Боготе́чней звезде уподобился еси, угодниче Божий Арефо, многих к свету Истины приводя поуче́ньми своими: сердца писа́вших тебе утешал еси, ни еди́наго забывая от скорбных, твоих наставлений и заступления праведного Симеона требующих. Сице и ныне не преста́й возносити молитвы твоя о чтущих тя и Богу поющих: Аллилуйя.

Икос 5

Видеша ты братия дивнаго подвижника, смирения и кротости испо́лненнаго, егда подъя́л еси тяготы́ настоятельства, общаго жития устав во обители насаждая, и братство иноческое укрепля́я. Мы тебе, за благоуправле́ние искусное в сан архимандри́та возведе́нному, похвалы приносим сицевы́я:
Радуйся, иго Христово, благое и легкое, возлюби́вый: / радуйся, собою и́ноком пример яви́вый.
Радуйся, о нестяжа́нии обеты соблюда́вый: / радуйся, довольство всяческое во Христе стяжа́вый.
Радуйся, на письма отвещавый пастве со усе́рдием: / радуйся, нас богомудро науча́яй милосе́рдию.
Радуйся, добродетелей простра́нное селе́ние: / радуйся, тайных по́двигов исполне́ние.
Радуйся, от Бога предузна́вый день кончины и час: / радуйся, не престай доныне удивля́ти нас.
Радуйся, надеждою, любовию и верою окриля́емый: / радуйся, терпением гобзова́нно укрепля́емый.
Радуйся, Арефо, о нас молитвенниче к Богу неустанный.

Кодак 6

Проповедника Слова Божия стезю́ ше́ствовал еси, отче наш Арефо, потща́вся просвещати люди словом, делом и молитвою о них твоею, и та́ко воспита́в братию и жителей окре́стных. Яви́шася тогда с упованием на милость Бога неизреченную, стра́нствующих поток в пределы Верхотурския. Ныне же и нас науча́еши взывати Богу чистым сердцем: Аллилуйя.

Икос 6

Возсиял еси, яко звезда пресве́тлая, людям стра́ждующим: му́жие бо, жены́ со младе́нцы, старцы с ю́нотами, богатии и убо́зии, к тебе притека́юще, утешение обретаху, яко правило себе положил еси, да никто же оты́дет от тебе не утешен. И благим житием любовь пасомых приобре́т, ныне прие́млеши от нас похвалы таковыя:
Радуйся, не земных наград иска́вый, но вы́шняго спасе́ния: / радуйся, о тленней пище отложи́вый попече́ние.
Радуйся, образе равноа́нгельнаго жития́: / радуйся, зате́пливый ду́ши чад теплотою души́ твоея́.
Радуйся, настоятелю, путем единым Марфы и Марии проше́дый: / радуйся, любовь Христову к челове́кам ве́дый.
Радуйся, даже до кончины не оста́вивый молитвы труда: / радуйся, твое бо житие не утаи́ся, яко полново́дная река.
Радуйся, кинови́и иноков мудрый настоя́телю: / радуйся, наставлений пастырских пода́телю.
Радуйся, от гнева и печали наше огражде́ние: / радуйся, земли Уральския благое украше́ние.
Радуйся, Арефо, о нас молитвенниче к Богу неустанный.

Кондак 7

Хотя Человеколюбец Господь укрепи́ти твое усердие к братии, разуме́нием книжным одари́ тя: имея бо велие попечение о писа́ниих душеполезных, разшири́л еси книгохранилище монастырское, дабы братия обретала еси в чтении силу и мудрость. Озаря́ема и ныне светом духовным, радостию воспевает Богу: Аллилуйя.

Икос 7

Новый наставниче монахом, отче Арефо, прине́сл еси в обитель вся сокровища души любвеоби́льныя и разума пресве́тлаго, сего ради труды твоими благоустрое́ние монастыря и благочи́ние молитвенное зело́ прехва́льно бысть: да и́ночествующих житие послу́жит ко просвещению премно́гих, да ки́йждо сице воспоет тебе:
Радуйся, многих к вере и́стинней приведы́й: / радуйся, венец бессмертия ныне обреты́й.
Радуйся, на ловитву человеков предизбра́нный:/ радуйся, в труде́х подвиж-ничества испыта́нный.
Радуйся, просиял еси тишиною духа и му́дростию: / радуйся, яко стяжа́л еси богатство велие ску́достию.
Радуйся, сердца мяту́щихся и ско́рбных успоко́ивый: / радуйся, всех иноков на лад молитвенный настро́ивый.
Радуйся, в учителя Творцом поста́вленный: / радуйся, Богородицею в попече́ниих не оста́вленный.
Радуйся, юных к целомудрию возведе́ние: / радуйся, в старости и немощи подаяй терпе́ние.
Радуйся, Арефо, о нас молитвенниче к Богу неустанный.

Кондак 8

Стра́нника и прише́льца быти в мире сем себе помышля́я, о богатстве земне́м попечение отложил еси, и всякое стяжа́ние суетное себе возбрани́в, поучал еси образом жития своего, кротостию обилие благодати утаева́я. Не попусти убо и нам унынием воздрема́ти, но сподоби купно со святыми воспевати Богу: Аллилуйя.

Икос 8

Весь Божественныя любве́ исполнен, преподобне, и сия́я пред человеки, славно потрудился еси во устроении обители множеством всяческих дел: зданий и ограды ка́менныя сооружением, иконныя и книжныя продажи расшире́нием, и прочими труды твоими. Мы же, видя твоем усердие, и милость Божию, воспеваем сице:
Радуйся, обитель стеною камня и молитвы огради́вый: / радуйся, начало возведению собора положи́вый.
Радуйся, к тому привлек еси благоукраси́телей: / радуйся, здания во еже чад учи́ти возведы́й в обители.
Радуйся, сребра́ на благолепие обители не пожале́вый: / радуйся, славянской Библией от начальства награжде́нный.
Радуйся, хозяйство монастырское устроивый преудиви́тельно: / радуйся, пита́вый нищия в твоей обители.
Радуйся, со всеми кроткий собесе́дниче: / радуйся, любимый братиею наста́вниче.
Радуйся, во бдениях молитвенных учителю преди́вный: / радуйся, в ще́дротах милости неистощи́мый.
Радуйся, Арефо, о нас молитвенниче к Богу неустанный.

Кондак 9
Все естество́ ангельское и человеческое Богу воздаде́ хвалу, егда ты, отче милостиве, чад, стра́ждующих от глухоты неисцели́мыя, и не могу́щих словесы́ ко ближним обрати́тися, училищем особым одари́л еси, да словом Божиим пита́ются, мы же благодаряще Бога, милосердием тя надели́вшаго, вопием Ему: Аллилуйя.

Икос 9

Вети́и многослове́снии не возмо́гут изрещи́ всю силу любве твоей к чадом глухим и гугни́вым, родителей не иму́щим, их же делом и словом приводи́л еси к познанию Истины, да и ти́и, в возраст прише́дше, помина́ют заветы праведныя. Темже и мы, труды твоя прославля́юще, во умилении зовем ти:
Радуйся, предо́брая отрасле своих роди́телей: / радуйся, жития по заповедям Божиим учи́телю.
Радуйся, всегда ко Господу о помощи взыва́яй: / радуйся, Тому моли́тися непреста́нно науча́яй.
Радуйся, ученики терпением воспита́вый: / радуйся, в их нужды заботливо вника́вый.
Радуйся, любовию пастырской нас утеша́яй: / радуйся, милость Владычице к нам приклоня́яй.
Радуйся, в ско́рбех терпению Христову научи́вый: / радуйся, в трудех усердных душу положи́вый.
Радуйся, земное ни во что же вменя́яй: / радуйся, паче не́же о теле, о душа́х пещи́ся наставля́яй.
Радуйся, Арефо, о нас молитвенниче к Богу неустанный.

Кондак 10

Спасти хотя́ща всякаго человека, Бога молил еси, отче, да всех приходящих к тебе, на путь спасения наставит: не могу́щих же посетити тя, архимандрита Верхотурского, денно и нощно письмены́ вразумлял и утешал еси. Темже и мы моли́тися не облени́мся, и плоти утесне́ния не устрашимся,и воспоем Творцу: Аллилуйя.

Икос 10

Сохраня́я в сердце слова Спасителя: дади́те, и дастся вам, устремился еси житием своим подражати Христу, сиянием духовных словес твоих пробуждая спящих во зле, возжигая сердца уны́лых. Ныне убо слезы наша приложи́ на радость, приемля от нас сицева́я:
Радуйся, в твоих писа́ниих предивный сове́тниче: / радуйся, растерза́вый сети лености и любоче́стия.
Радуйся, к трудо́м на ниве Божией путеводи́телю: / радуйся, невоздержания и самочи́ния обличи́телю.
Радуйся, потаенный подви́жниче и мудрый нестяжа́телю: / радуйся, о братии небесный ныне назира́телю.
Радуйся, о летописи монасты́рстей попече́ние яви́вый: / радуйся, Евангелием тьму растущего безверия освети́вый.
Радуйся, сиро́т и вдови́ц словом утеша́яй: / радуйся, своим примером брата вразумля́й.
Радуйся, путем и́ноческим ко спасению проше́дый: / радуйся, узкими враты́ в рай вше́дый.
Радуйся, Арефо, о нас молитвенниче к Богу неустанный.

Кондак 11

Иму́щи ти строгость к себе, к другим же ве́лию милость, откры́ тебе Создатель час твоего исхода. Темже убо в праздник Вознесения Господня, по причащении, ру́це свои омы́в, рекл еси братии: менее будет вам труди́тися по смерти моей. Мы же, дивящеся твоему о ближних смотрению, с сонмом святых Екатеринбу́ржских ныне воспеваем Богу: Аллилуйя.

Икос 11

Яко светильник Небеснаго света в земне́м житии́, рекл еси Михаилу, келейнику своему: се, смерть моя прии́де. И тако, зна́мением крестным себе осени́в, и всех благословив, руце мирно сложил еси, душа же твоя боголюбивая в царский чертог нетрудно оты́де. Сего ради, о твоем блаженнем успении радующеся, вопием ти:
Радуйся, сам себе омы́вый ру́це пред конце́м: / радуйся, реки́й: простите мя, обращая́ся ко всем.
Радуйся, небесный ко Творцу предста́телю: / радуйся, поющим тя благих пода́телю.
Радуйся, подвижниче, в молитвах возраста́вый: / радуйся, коленопреклонения многие соверша́вый.
Радуйся, горение и ангельскую чистоту стяжа́вый: / радуйся, успением тихим святость показа́вый.
Радуйся, трудом, молитвою к отходу угото́вленный: / радуйся, блаже́нныя кончины Богом удосто́енный.
Радуйся, близость отшествия духом предуве́девый: / радуйся, ныне обители небесная насле́дивый.
Радуйся, Арефо, о нас молитвенниче к Богу неустанный.

Кондак 12

Благодать и радость духовную дарова́ нам Господь на праздник Преображения Своего, егда́ уве́деша вернии о честне́м обре́тении мощей твоих, угодниче Божий Арефо. Темже прославление твое в ли́це преподобных воспевающе, потщи́мся всемерно подража́ти добродетелем твоим, и преображе́нным сердцем радостно взыва́ти: Аллилуйя.

Икос 12

Поюще теплое твое предста́тельство и скорое заступление, ублажаем тя любовию, яко молитвенника о нас пред Богом. Ты же наста́ви нас на путь спасения, да сла́вяще пред ра́кою смиренному́дрие твое и кротость, с ревностию о Бозе во умилении зовем ти:
Радуйся, Божественная благодати чи́стая струя́: / радуйся, яко вси тя почитающия, наде́емся на тя.
Радуйся, в блаженней нищете и простоте спасе́нный: / радуйся, в обители воссозданной мощьми́ явленный.
Радуйся, на све́щнице поставленный светильниче Ура́льския земли: / радуйся, новый образе духо́вной чистоты.
Радуйся, от Бога увенча́нный бессмертия венце́м: / радуйся, яко к мощем твоим с любовию теце́м.
Радуйся, в незлобии святому Симеону подража́телю: / радуйся, честных монахов воспита́телю.
Радуйся, со старцем Илие́й на небеси́ лику́еши: / радуйся, сердца́ тебе молящихся врачу́еши.
Радуйся,Арефо, о нас молитвенниче к Богу неустанный.

Кондак 13

О премилостивый и кроткий отче наш Арефо! Приими́ сие малое хваление, и моли Господа, да исцелит нас от всяких неду́гов, да свободи́т от скорбей и наветов вра́́жиих, да утвердит нас в крепости веры и де́лех добрых. Умоли́, отче преподобне, Человеколюбца Христа, да простит нам вся согрешения, и да сподо́бимся в страшный час смертный твоим заступлением насле́довати Царствие Небесное, и в радости блаженней воспевати Богу: Аллилуйя.

МОЛИТВА
Святому преподобному Арефе, архимандриту Верхотурскому

О Священное главо́, преподобне отче, преблаже́нне авво Арефо! Не забуди убо́гих твоих до конца, но поминай нас всегда во святых твоих и благоприя́тных молитвах к Богу. Помяни стадо твое, еже сам упасл еси, и не забуди посеща́ти чад твоих. Моли за ны, отче священный, за дети твоя духовныя, яко име́яй дерзнове́ние к Небесному Царю: не премолчи́ за ны ко Господу, и не пре́зри нас, верою и любовию чтущих тя. Поминай нас, недостойных у престола Вседержи́телева, и не престай моля́ся о нас ко Христу Богу: ибо дана тебе бысть благодать за ны моли́тися. Не мним бо тя  суща ме́ртва: аще бо телом и преставился еси от нас, но и по смерти жив сый пребыва́еши. Не отступай от нас духом, сохраня́я нас от стрел вра́жиих и всякия прелести бесо́вския и ко́зней диавольских, пастырю наш добрый. Аще бо и моще́й твоих рака пред очи́ма  на́шима видима есть всегда, но святая твоя душа со ангельскими во́инствы, со бесплотными ли́ки, с небесными силами у Престола Вседержи́телева предстоя́щи, достойно весели́тся. Ве́дуще убо тя воистину и по смерти жи́ва су́ща, тебе припа́даем и тебе молимся: моли́ся о нас Всесильному Богу,о пользе душ наших, и испроси́ нам время покаяния, да невозбра́нно прейдем от земли на небо, от мыта́рств же горьких, бесо́в, воздушных князе́й и от вечных мук да избавимся, и Небесного Царствия наследницы да будем со всеми праведными, от века угоди́вшими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков. Аминь.